ለደብዳቢ የተፃፈ ደብዳቤ (በላይ በቀለ ወያ)

ለደብዳቢ የተፃፈ ደብዳቤ 

(በላይ በቀለ ወያ)

እንዴት ነህ ኢህአዴግ ፣ እኛ አለን በደህና

ባመቻቸህልን ፣ የልማት ጎዳና

ተገናኘን ስንል ፣ እየተጠፋፋን

ተቃቀፉ ሲባል ፣ እየተገፋፋን

ራዕይ አንግበን ፣ አላማ ቀልሰን

በውሳኔዎች ላይ ፣ አቅቶን መወሰን

ዘር እየገነባን

በልማቱ ምክንያት ፣ ሰዎችን አፍርሰን

ነፃ ወጣን እያልን

ያስተሳሰሩንን ፣ ገመዶች በጥሰን

አለን ህግ አክብረን ፣ አለን ህግ ጥሰን።

አንተ ግን እንዴት ነህ

ምርጫ በሌለበት ፣ ምርጫ ያሳተፍከን

አባባነት እድሜ

ወዛችንን መጠህ ፣ ቀስመህ ያነጠፍከን

ንብ ነህ ብለን ስንቀርብ ፣ ፈጥነህ የነደፍከን

ማሩን ማሩን ስንል ፣ ምሬት ያሳቀፍከን

ግብርህ እየጠፋ ፣ ስምህ የተረፈን

እንዴት ነህ ኢህአዴግ

ምነው ሳንገናኝ ፣ አራት ወር አለፈን?

እኛማ ይኸውልህ 

ማንም ለራሱ ግብ ፣ ጠልዞ ሚሰደን

ከግር ወጣን ስንል ፣ መረብ የሚጠምደን

ኳስ ህዝቦች እንደሆን ፣ ቢገባንም ቅሉ

"ሁሉ ቀርቶልናል" 

ለማለት ባንደፍርም ፣ ባይገልፀውም ቃሉ

ከበፊቱ አንፃር ፣ ጭቆና ቀንሷል

ከበፊቱ አንፃር ፣ ዛሬ ፍቅር ነግሷል

እርግጥ ነው አንክድም

ዛሬም መግደል አለ ፣ 

ከህይወት ያረፈደ ፣ ሞትን ይተኩሳል

አፈ ሙዝ ይመስል...

ደና ነገር ካፉ ፣ አለ የማይወጣው

አልጠፋም አፈናው 

አልጠፋም ዘረፋው ፣ አልጠፋም ረገጣው

ግን ደሞ ግን ደሞ

ከትናንቱ አንፃር ፣ ዛሬ ላይ ቀንሷል

ግን ደሞ ግን ደሞ

ከትላንቱ ዛሬ ፣ ስጋታችን ብሷል ።

የሆነው ሆነና 

እንዴት ነህ ኢህአዴግ ፣ እኛ አለን በደህና

ያመቻቸኸውን ፣ የልማት ጎዳና

ወስነን ለማጥፋት

በጀመርነው መንገድ ፣ በዝቶብን እንቅፋት

አላራምድ ሲለን 

ለአንድ ሀገር መኖር ፣ አንዳንዶች ተገድለን

ለአንዲት ሀገር ፈውስ ፣ አንዳንዶች ቆስለን

እንደ ድሮ ዘንቢል ፣ ተስፋ አንጠልጥለን

ካቆምከው ጨለማ

የምንወጣበትን ፣ ፀሐይ ሐሳብ አዝለን

ካለመኖር መኖር

በሚል አዲስ መንገድ ፣ እኛ እንዳለን አለን።

አንተ ግን እንዴት ነህ ?

ኖረህ እንደሌለህ ፣ የምትናፍቀን

የምትጨልም በቀን

በምርጫ ኮሮጆህ ፣ ልክ እንደበቀቀን

ድምፅ የምትነጥቀን

ከእለት እንጀራ ላይ

የአመት ግብር ቆርጠህ ፣ የምታሳቅቀን

ሁሌ መቶ ፐርሰንት ፣ ተመረጥኩኝ ምትል

ስድስት ጊዜ መድቀህ

አንዴ ስትነሳ ፣ እንደያሬዱ ትል

ፅናቴን እዩልኝ ፣ ትግሌን ተመልከቱ

ብለህ የምትፈርድ ፣ በአመተ ምህረቱ

መረጥጠኝ ያልከው ህዝብ

አንድ ዜሮ አክሎ ፣ ከመቶ ፐርሰንቱ

ሺህ ፐርሰንት ሚጠላህ 

እንደምነህ ኢህአዲግ 

አንድ ሙሉ ትውልድ ፣ ቀርጥፈህ የበላህ?!

እኛማ ይኸውልህ

ለካድሬ ግልምጫ

ለፌደራል ጡጫ

ለአጋዚ እርግጫ 

ማንም ሲያቀብለን

ሞት እንደ ጆሮ ጌጥ ፣ የሚያንጠለጥለን

እንደተፋቀ ካርድ ፣ 

ማንም እየሞላ ፣ የትም የሚጥለን

ጭንቅላት የሌለው

በጁ እንደ ጠብመንጃ ፣ የሚያቀባብለን

ለሞት የታጨ ህዝብ ፣ ብንሆንም ቅሉ

"ሁሉ ነገር ቀርቷል"

ለማለት ባንደፍርም ፣ ባይገልፀውም ቃሉ

ጭቆናው ባይቀርም 

መጣል መረገጡ 

ውጣና ውረዱ ፣ ኑሮ ውጥንቅጡ

ቀርቶልናል ብለን ፣ ለማውራት ባንደፍርም

ከትላንቱ አንፃር

የዛሬ ነፃነት ፣ ሳይሻል አይቀርም

ፌደራሎች ስናይ ፣ አንደነብርም

አንፈረጥጥም ፣ አጋዚ ሲመጣ

ጨርሶ ባይነጋም

የንጋት ተስፋ አለን ፣ ፀሐይ እንድትወጣ።

ጨርሰው ባይጠሩም

ሁሉ እንደትናንቱ፣ አልቀሩም ደፍርሰው

ከተኩላዎች መኋል 

በጎች ተገኝተዋል ፣ 

የተኩላዎችን ለምድ ፣ የኖሩ ተላብሰው።

አንተ ግን እንዴት ነህ ፣ 

እንዴት ነህ ኢህአዴግ

የበግ ለምድ ለብሰህ ፣ በግ የምትጨርሰው?!

እኛማ ይኸውልህ

መቅሰፍት ስንጠብቅ ፣ ምህረት ዘንቦልን

አለን እየፀለይን ፣ እንዳትኖርልን።